انا خاطري قد له قريب الشهر حساس
بعد هزت رياح المقادير هقواتي
اهوجس وياخذني على بابك الهوجاس
واحاكيك واسمعني ياسيد علاقاتي
محطات عمري واجده مالها مقياس
واشوف انك اعذب مرحله في محطاتي
طموحاتي تناديك بين الرجا واليأس
امانتك أمانه لاتهمش طموحاتي
تعال ابغي عيونك وقلبك فـ كلمة راس
واعلمك عن هزايمي وانتصاراتي
مثل ماخلد شعر الفرزدق وابو نواس
ابصورك واخلدك في كتاباتي
في راسي من الشعر
وفي صدري من الاحساس
ما يجعلك تسكتثر علي ابتساماتي
تمر المكان وتنحني لك قلوب الناس
هذا قلبه يسلم وذا قلبه يحاتي
من المفترض ماتمشي الا معك حراس
حسب رأيي الشخصي وتقديري الذاتي
على الحرام انك قمر لبسوه لباس
تفكر له العالم متى عاده بياتي
تزين بك الفضه ويكشخ بك الألماس
ويشفق لك فؤادي وتطرب لك ابياتي
لو ان الليالي تردك علي تبناس
ابحبها لين استرح من معاناتي
احبك كثر ماهو يجيبك لي النسناس
وكثر ماتردد صورتك في خيالاتي
وأحبك وانا فارح واحبك وانا محتاس
واقدرك واداريك في كل حالاتي
على عينك اللي دايماً تخطف الانفاس
تلفات قلبي كل يوم وتلفاتي
وعلى وجهك الزين وعلى قدك المياس
امان الله وحفظه وصادق تحياتي
محطات عمري
شيلة دويتو بين المنشدين حمد ال خزينه وطالب الصعاق وهي شيلة رومانسية من كلمات الشاعر فهد بن سهل وتوزيع المبدع احمد محروس.