القائمة إغلاق

كلمات شيلة مايوسع خاطري – محمد العيافي

كلمات شيلة

ما يوسع خاطري لا ضاق جاشي
غير سج القاع وانسام الهبايب
ودي اضرب تختخن ماهو يناشي
من همومن شبت بصدري شبايب

جعل براقن يرف من المناشي
صوب دار الزين منسوع الذوايب
جعل يسقي دارها وبل الرشاشي
جادلن عن حبها مانيب تايب
العهد في ناعم العود الهشاشي
زل دونه عام وجروحي عطايب

زين هرجه بالمعاتب والنقاشي
يوم قال شفيك ناسيني وغايب
والله ان منساك يا زاه القماشي
لين تركز فوق جثماني نصايب

ابعدتني عنك مبعدت المعاشي
كل سودن حبها من حب شايب
يا مناة الروح يا سر انتعاشي
منزلك ثابت ورا العوج الحدايب

شبه عجمن قد رعت صيف الفراشي
عند ابن زومان فكاك النشايب
كسبنا ما جات من سوق المواشي
بالسيوف اللي عليها الدم رايب

من تبـدوا مثلـنا والا بـلاشي
ما تبـدوينا محايـير الجـلايب
لا وردنا العد ما نرجع عطاشي
منزحين الخصم عطبين الضرايب

دونها قد سيقت الأرواح كاشي
انتعمد عندها كبار المصايب
جعل تفداها مجمعت المعاشي
من تصر المال دون ام الجنايب

 

مايوسع خاطري

عمل جديد للمنشد السعودي محمد العيافي وشيلة مايوسع خاطري من كلمات الشاعر شجاع بن بتال.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

error: Content is protected !!