يالعليوي في علاوي نجد
يا التميمي يا سليل المجد
والله انك يا عريب الجد
وجهه ووجه ووجيه وجاه
جعل صوتك ما يهما ياخيك
والله يعافيك ويخليك
لعزوتك ومحبك ومغليك
محترم وتنومس حمياه
لا نزعت الصوت صوتك غير
والله انه يرجهن الطير
وسايق الموتر يعكس السير
والصويب يجيك ومن اقصاه
لا نزعت الصوت كلن شاش
صوتٍ اجش أونظم من جاش
ومن نوى المكشات والمطراش
حط سيديك على يمناه
يابن عمي صوتك المزمار
وسلوة السارين والسمار
ومن ضرب له خط أو مشوار
صوتك العذب الندي خاواه
وبعد هذا يالعلي يا سعود
ماش علمٍ عن رقيق العود
مهجتي راع العيون السود
شيب عيني وآه واغبناه
أنشد الاقراب والاجناب
واتصفح كل يوم سناب
وفيس واستقرام والواتساب
والله اني ما قدرت ألقاه
أشهد أن حب الغضي ذباح
وأشهد أن البعد نزع أرواح
والجفا بعد الوفا فضاح
والمعذب ماله الا الاه
آه ما اقوى قلبه وما اقساه
يحسب انه لا ابتعد باسلاه
ما درى اني بعده بمأساه
ولا درى اني مستحيل أنساه
كنها ليلي وانا المجنون
وهجر ولاده لابن زيدون
وقبلي القاضي وابن لعبون
وعنتره في حب عبله تاه
يالعليوي في علاوي نجد
جديد المنشد السعودي عبدالعزيز العليوي شيلة في علاوي نجد وهي من كلمات الشاعر خليل الشبرمي وتوزيع محمد المرزوق.