كلمات شيلة سليم سليم – فهد بن فصلا

سليم سليم ويش اسوي بـ سدٍ باح
وانا ما طرالي عنه اسولف ولا انوه
عيوني تبى المسرا وقلبي يبى المسراح
وعقلي يقول بكيفك اللي تبي سوه

 

تناقضت مع نفسي على حزة المرواح
مع ان الحزن في خاطري شاعمٍ ضوه
والارض الوسيعه ما تبي وصف والا ايضاح
سباريتها فيها عن الضيق تلهوه
تعبنا نحسد الطير يوم ان معه جناح
وهو عيشته ف الارض مااهيب في جوه
سليم سليم عطني الجيب والمفتاح
ولا عاد ابيك تدور اللي منه خوه
معي ضيقةٍ يوم اتلقا الخلا تنزاح
يا زين الخلا حتى ولو دربه ايتووه
متاهاته ارحم من قلوبٍ مهيب اصحاح
ومن حاجةٍ لـ النفس ماهيب محلوه
على اني من اللي يعشق الصبر والإلحاح
لكن الليالي ما تبي صبر وفتوه
ياكم حاجةٍ صديت عنها عشان ارتاح
مهوب اي حاجة لازم تصير بالقوه
عقلت وقعنت بحظي ان قام والا طاح
انا مؤمن بحكم القدر خيره وسوه
من يعلق احلامه على رجعة اللي راح
مثل من حذف جثة حواره واخذ بوه
حياتي بلد لكن ما تقبل السياح
وقلبي على قطع الدير عنده جروه
مانيب محدود اجامل الحاقد المزاح
واضيع بعض وقتي على ليته ولوه
ضعيفٍ تقول : يشيل فوقه حصاة ارزاح
على الدنفسه والغطرسه عايشٍ جوه
عرفنا دواء نقص الفتامين والأملاح
لكن البلا اللي ينقصه عرف ومروه
مشاكل بعضنا ماتبي حرب والا سلاح
ولا فلسفة عالم ولا شاعر مفوه
ياليت الورش فيها لبعض العقول اصلاح
ونقدر نصلح كل خربان ومشوه

قنعت بحظي

يعود المنشد السعودي فهد بن فصلا بـ شيلة جديده طربيه وهي شيلة سليم سليم / قنعت بحظي وهي من كلمات الشاعر عناد الشيباني.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *