جاد كف السما ياحي ردم الغيوم
ينثر الما على خدن جرحه الجفاف
ليلةٍ في سماها ماتشوف النجوم
تحت برّاقها يسري بعيد المطاف
يركز البرق من كبد السما بالرجوم
يرتجف من رعدها الكون كل ارتجاف
يكتب الله على ظهر المفالي وسوم
ويسقي الارض لين ارض البسيطة تعاف
تاخذ ايام وتجيك الصوّر والعلوم
يورق العود والباذر يشق ويشاف
من بعدها على صهوة قوي العزوم
اشهبٍ مايهاب ولا يكل ويخاف
يطوي البيد وان طبّ المناقع يعوم
البسيطة فراشه والسما له لحاف
جاهزٍ كنه الفندق بخمسة نجوم
منوة الطيّبين اهل القلوب النظاف
مبعدين الهقاوي ماسكين السلوم
باليدين الكريمة والنفوس الخفاف
من خيار الرجال العارفين القروم
خوةٍ مابعدها لو حياتك كفاف
يتبعون الحيا ولا على الناس لوم
حلو وجه الحيا عقب السنين العجاف
تلبس العشب والرقروق روس الحزوم
في ربيعٍ ليا شفناه ما من خلاف
يلقطون الكما تكل مواخيذ قوم
كنه الكنز يحفر عن طريق الحواف
من غلاها تقول مبشّرينٍ بتوم
شوفة الفقع تخطف من لقاه اختطاف
حي والله نبا اللي بالخضيرا يحوم
اينع الشعر له واليوم وقت القطاف
حي بدر العلي وآلاد زايد عموم
لابة جابت الافعال ماهي جزاف
خلّوا المعتدي من فعلهم ما يقوم
بالقنا والمشوّك والسيوف الرهاف
وبدر من لا يشوف افعال بدر محروم
الفعايل ورق وافعال بدر الغلاف
وقفته واضحه وافعال مثله تشوم
عن سوى بدر ما جتنا الصور بإحتراف
في ربوع الديار وفي ربيع الرسوم
للسياحة يعيد الناس للإكتشاف
في سنابه علاج اللي وطته الهموم
ياخذ الناس من عمق الكدر للضفاف
جاد كف السما
المنشد السعودي عبدالعزيز العليوي يعود بشيلة جاد كف السماء وهي من كلمات الشاعر صالح السهلي وعرض الفيديو كليب والشيلة على القناة الرسمية باليوتيوب.