عليك السلام ورحمة الله يابيت الطين
وعلى كل شخصً عاش في وسط جدرانك
جروح العرب تبرأ وجرحي ليا هالحين
ربط حاظر الدنيا بماضيه من شانك
ياكم لي وانا يابيت والعين تسقي العين
ودفنت السعاده والفرح تحت سيسانك
اراجع شريط الذاكره بين حين وحين
وتوقف بي الذكرى على اطراف بيبانك
تربع غلاك بخاطري من غلا الغالين
ياصعب اني انساهم ويا صعب نسيانك
ابقول كلمه واجعلو حولها قوسين
وش هي لذت الدنيا لاا ودعت شيبانك
عليك اصعب من الهم واثقل من اثقل دين
ولا عاد لك حيلة كان الله ما عانك
الله يقطع الفرقاء وغيب المفارق شين
تشوف انكسار الذات في صفحة احزانك
عزومك تردى والهقاوي تردى لين
تثقل عليك الكلمه اللي على لسانك
يضيق الفضاء ويضيق صدرك من الصوبين
مثل ما يضيق خاطرك شوف ديانك
اتدور على على افجوج الخلا والعرب ممسين
من الضيقة اللي فورت دم شريانك
صواديف بقعاء عاقبتني يابيت الطين
وانا كل يوم اروح وارجع على شانك
عقب مافقدتك والله ماشفت شي زين
مشاكل حياتي تنكتب تحت عنوانك
انا والله اني ميت والعرب حيين
لكن الرجاء يالله بعفوك واحسانك
اجامل ظروف الوقت واجامل السالين
وعلقت قلبي فيك يارب سبحانك
بيت الطين
المنشد السعودي فلاح المسردي يعود بشيلة بيت الطين وهي شيلة حزينة تتحدث عن ايام الماضي وبساطة الحياه والظروف التي يعانيها الانسان جراء فقد الاحباب وهموم الحياة وشيلة بيت الطين من كلمات الشاعر ناصر بن لمدان.