ابطيت ما سويت لي بيت مردوف
مابه مواضيعً تشد انتباهي
عفريت شعري مل له وقت مكتوف
وانا بعد والله عن الشعر لاهي
حتى حصلي شوف ياحي هالشوف
ضميان واروتني خطو التباهي
مدعوجة العينين والخد مكشوف
تقول براقً بليل الدواهي
موصوف بالرقة وبالرهف موصوف
ولْلطف محتاجه تمده تجاهي
يا عابره روفي ترا القلب ملهوف
لا تزود اللهفه على زود ماهي
اثر المحبة شوف ثم بعدها خوف
انك وقعت بدرب والدرب داهي
دربٍ شقي ماله هويه ومعروف
انه يعني من وقع فيه ساهي
يا عابره ماني على الشوف مكلوف
لاكن جمالك من نظر فيه تاهي
حي هالشوف
جديد عبد العزيز العليوي شيلة حي هالشوف من كلمات الشاعر مروان السديس.